విశ్వంలో చక్కెరను గుర్తించిన శాస్త్రవేత్తలు.. జీవం ఆవిర్భావంపై కొత్త ఆశలు!
➤అంతరిక్షంలో చక్కెర అణువులను శాస్త్రవేత్తలు గుర్తించడం విశ్వంలో జీవం ఆవిర్భావంపై కొత్త ఆశలు రేకెత్తిస్తోంది. ‘నేచర్ ఆస్ట్రానమీ’ జర్నల్లో ప్రచురితమైన తాజా అధ్యయనం ప్రకారం పాలపుంత గెలాక్సీ మధ్యభాగంలోని దట్టమైన వాయు మేఘంలో ‘ఎరిథ్రులోజ్’ అనే నాలుగు కార్బన్ అణువులతో కూడిన చక్కెరను అంతర్జాతీయ పరిశోధక బృందం గుర్తించింది.
➤ఈ పరిశోధనకు ఖగోళ రసాయన శాస్త్రవేత్త ఇజాస్కున్ జిమెనెజ్-సెర్రా నాయకత్వం వహించారు. ఎరిథ్రులోజ్ అనేది థ్రియోస్ న్యూక్లిక్ యాసిడ్ (టీఎన్ఏ) ఏర్పాటుకు కీలకమైన రసాయనం. జీవం ఆవిర్భావానికి ముందు ఆర్ఎన్ఏ, డీఎన్ఏలకు పూర్వ రూపంగా టీఎన్ఏ ఉండి ఉండొచ్చని శాస్త్రవేత్తలు భావిస్తున్నారు. దీంతో జీవం ప్రారంభానికి అవసరమైన రసాయన పదార్థాలు అంతరిక్షం నుంచే భూమికి చేరి ఉండొచ్చనే వాదనకు ఈ అధ్యయనం బలం చేకూర్చింది.
➤స్పెయిన్లోని యెబెస్ 40 మీటర్ల రేడియో టెలిస్కోప్, ఐరామ్ 30 మీటర్ల టెలిస్కోప్ సాయంతో ఈ పరిశోధన నిర్వహించారు. G+0.693-0.027 అనే మాలిక్యులర్ క్లౌడ్ను పరిశీలించిన శాస్త్రవేత్తలు, అక్కడ మూడు కార్బన్ల చక్కెరల కంటే ఎరిథ్రులోజ్ ఎనిమిది రెట్లు ఎక్కువగా ఉన్నట్లు గుర్తించారు. ఇది ఇప్పటి వరకు ఉన్న శాస్త్రీయ అంచనాలకు భిన్నమైన ఫలితమని పేర్కొన్నారు.
➤భారీ ఉల్కాపాతం జరిగిన సుమారు 4.1 నుంచి 3.8 బిలియన్ సంవత్సరాల క్రితం ఈ తరహా చక్కెర అణువులు లక్షల నుంచి కోట్ల టన్నుల మేర భూమిపైకి చేరి ఉండొచ్చని పరిశోధకులు అంచనా వేస్తున్నారు. ఇవి జీవానికి నేరుగా కారణం కాకపోయినా, జీవం ఆవిర్భావానికి కీలకమైన ఇతర చక్కెరలుగా సులభంగా మారే అవకాశం ఉందని వివరించారు.
➤ఈ ఆవిష్కరణతో అంతరిక్షంలో రైబోజ్ వంటి మరిన్ని జీవ సంబంధిత చక్కెర అణువులు కూడా లభించే అవకాశముందని శాస్త్రవేత్తలు అంచనా వేస్తున్నారు. విశ్వంలోని ఇతర ప్రాంతాల్లోనూ జీవం ఏర్పడే పరిస్థితులు ఉండొచ్చని ఆశాభావం వ్యక్తం చేస్తున్నారు.
